2020-01-06

2020放假攻略~機會是留給有準備的人~

又係大家關心嘅放假問題~睇睇個2020年日曆發現今年假期好多都落咗向星期六,五天工作嘅朋友,今年就咁就蝕咗4日!你話唔慳住放點得先!識得放一定係連假放,請三兩日就可以放足一個半個星期,咁先係打工仔之道!今年紅日主要落晒向4月同10月哩兩個月份,未有小朋友嘅一族,可以考慮放10月喎唔使同人迫向大時大節放呀麻!家長朋友們就留意番復活節前後放啦!


1. 農曆新年請3日變9日
列排農曆新年請2-3日,就有9-10日大假,今年都唔列外~ 請(1月29~31日)三日就變九日(1月25~2月2日),哩個大假真係好使好用,近年大熱不丹點睇先!地潔人靈順便吸收下啲仙氣,認真有益身心!
 


2. 復活節請4日放10日
今年復活節唔似舊年可以連住清明一齊放,不過點都有兩日紅日啦,又加上小朋友又有假放,啱晒一家大細出門去旅行啦!想連假放就可以放4月6~9日四天,咁就可以變10日(4月4日~13日)喇!4月初適逢日韓地區賞櫻季節,長短棍一樣掂。10日假期去個歐洲旅行都唔錯喎!克羅地亞十六湖、杜邦力古城又點睇先~


3. 佛誕連5.1放3日變9日
嫌農曆新年同復活節機票太貴飛唔起?4月尾5月頭機會又嚟喇!4月25~5月3日當中包咗4月28日佛誕仲有5.1勞動節兩個紅日,連住放又俾你砌番個9日大假添!咁多日飛遠啲去歐洲玩啦!


4. 端午連7.1放5日變11日
今年真係長線遊天下,放幾日就有10日8日大假喇!6月25日~7月5日包咗端午節同7.1回歸兩個紅日,臨近暑假又少啲人同你爭,連機票都平埋!盡得天時地利人和,你話唔請假真係對唔住自己啦!放11日喎梗係去歐洲美澳加個啲最抵飛喇!中東或者地中海又正啫!


5. 國慶+中秋請3日放9日
一年容易又中秋,今年中秋竟然同十一國慶連住一齊喎!完全唔使請連個周未都已經有4日假期,近近地飛轉台北、東京、首爾、曼谷又夠好啦!貪心如我就梗係飛遠啲啲啦!計我話去俄羅斯就啱晒喇!10月頭少少清涼可以感受到少少俄羅斯秋意,但又唔會好凍!


6. 重陽節免請假都有3日
放咗咁多個長假期,10月尾哩個重陽節向完全唔使請假下,賜你三天假期,近至澳門遠至台北都好使好用!Weekend Escape咪哩啲囉!


7. 聖誕節變相得1日

機乎年年聖誕節都有得連假放,請3日變9日10日架麻!偏偏今年冇囉!都唔知係應該叫好彩,12月25日係星期五連周未都仲有3日假期嘅!旺季三日假期仲去得邊樹啫,過澳門HEA吧啦!

 

 

PS: 大家未必可以跟足上文講去勻咁多次旅行,不過發白日夢幾時都係打工仔嘅職業病之一!得閒發下夢,人都醒神啲!

 

文:停不鳥


Top
手機APP

©1999-2016 香港永安旅遊有限公司

牌照號碼: 350074

2020放假攻略~機會是留給有準備的人~

Top