2018-12-18

旅行時如何避開人潮 | 一眼睇晒!日韓台泰2019年公眾假期

作為一個觀光客好多時都係人去我去!不過心底裡又唔想同人迫,影相時身邊圍住一班路人甲乙丙。當然如果閣下只能响旺季先出門的話,其實都幫唔到你幾多,不過其實即時大時大節出門都唔一定好多人,因為當地未必如香港放相同假期,好似聖誕節農歷新年端午節復活節等日子,並唔係全世界都係公眾假期,同埋好多時最高人流亦唔係哩啲香港外遊大節,而係當地紅日,香港地得七百萬人紅日出街都多人啦,換轉日本或者泰國紅日、一個東京曼谷分分鐘都成千萬人同你一齊倒數,你都咪話唔迫迫!所以出發前最好先弄清楚當地公眾假期!

查詢各目的地法定假期,請瀏覽>>https://publicholidays.global/


日本紅假小知識

2019年日本當地可預測原定只有三個連休假期,包括5月4至6日、8月10至12日、以及11月2至4日。不過最近日本政府公佈,將4月30日至5月2日定為2019年特別法定假期!即係話從4月27日起至5月6日將會史無前例咁出現十連休假期!閣位巴打絲打,記住係全日本人都放假呀!真係千祈咪揀哩個檔期去日本,否則注定捱貴租兼迫餐死!

不過說回來哩三個連休假期冇踩正復活節、賞櫻或者追楓檔期,應該影響唔算大,只要5.1唔去日本就冇問題!不過如果家長們打算暑假去日本旅行的話,就記得唔好搭正8月10~12日哩幾日喇!免得過就咪同人迫啦!


**周未連休假期:(日本史上最強十年休)4月27日~5月6日、8月10~12日、11月2~4日(以5天工作計算)


韓國紅假小知識

唔講唔知原來韓國同中國一樣慶祝農曆新年同中秋節,仲要連放三天假!所以各位自由行嘅旅客記最好盡量避免哩兩大假期出遊韓國!如果閣下想揀假期出遊的話,明年4月可以順道賞櫻花、另外11月當地又冇紅日,可以考慮10月尾11月頭去賞紅葉。不過雖然冇紅日,但係都要避開周未去主要景點賞花賞紅葉,小編試過周未去內藏山追楓,人多到一個點,真係繼續行又唔係,走又走唔到!車龍由山腳排到上山頂!


**周未連休假期:2月2~6日、9月12~15日(以5天工作計算)


台灣紅假小知識

估唔到台灣同韓國嘅法定假期都幾相似,都係咁少!不過傳統大假如農曆新年仲放得長過香港,假設5天工作的話由星期六起2月2日到2月8日,足足有成7日!哩下又有少少羨慕添!另外,2月28至3月3日又係另一個4天連休假期,之後就到雙十假期又係4連休!不過台灣咁近,只要避被哩啲日子,其實隨時都出遊好時機啦!


**周未連休假期:2月2~6日、2月28~3月3日、4月4~7日、10月10~13日(以5天工作計算)


泰國紅假小知識

原來泰國咁多法定假期,真係好羨慕呀!夾埋周未仲有四個連休假期添!特別係4月份第一個同二個周未都係連休假期,所以假如大家打算明年復活節去泰國旅行的話,最好揀番復活節正日個周未,就唔好提前出發,否則必定超多人!反觀3月、9月或者11月冇紅日,將會係我地出遊好時機!


***周未連休假期:4月6~8日、5月17~19日、7月27~29日、10月12~14日(以5天工作計算)


2019年度香港公眾假期

最後返嚟睇番香港個日曆先,人就係咁有比較先知自己有幾幸福,雖然話勞工法列有薪假只得7日,但係紅日就有17日,如果加埋係五天文職工作,一連仲有好幾次連休假期,又或者放一兩日變十日八日大假。所以香港人出遊數字每年都有升幅,當然香港人鍾意去旅行多過留港消費,仲有其他因素,好似有人嫌屋企細所以去旅行,有人嫌反正儲唔到錢就不如去旅行使埋佢、香港條街太多唔想迫所以要去旅行、香港消費太高所以又要去旅行!當然仲有好多正面思維嘅朋友包括小編在內,真心想見識多啲世界不同地方文化嘅!

【2019香港紅日請假攻略】延伸閱讀 ►►https://blog.wingontravel.com/TravelNews/News/72

文:停不鳥


Top
手機APP

©1999-2016 香港永安旅遊有限公司

牌照號碼: 350074

旅行時如何避開人潮 | 一眼睇晒!日韓台泰2019年公眾假期

Top